ഈഴുവത്തിരുത്തി കുംഭാര കോളനി നവീകരണത്തിന്20 ലക്ഷം രൂപ അനുവദിച്ചു

പൊന്നാനി: മണ്ഡലത്തിലെ ഈഴുവത്തിരുത്തിയിൽ സ്ഥിതി ചെയ്യുന്ന കുംഭാര കോളനിയുടെ അടിസ്ഥാന സൗകര്യ വികസനത്തിന്‌ 20 ലക്ഷം രൂപ അനുവദിക്കുകയും , പ്രവൃത്തി നടത്താനുള്ള ഭരണാനുമതിയും ലഭിച്ചു “കുംഭാര കോളനി അടിസ്ഥാന സൗകര്യ വികസന പദ്ധതിയിൽ ” ഉൾപ്പെടുത്തി പിന്നോക്ക വിഭാഗ വികസന വകുപ്പാണ് തുക അനുവദിച്ചിരിക്കുന്നത് . കുംഭാര കോളനികളിലെ അടിസ്ഥാന സൗകര്യം വികസിപ്പിക്കുന്നതോടെ മൺപാത്ര നിർമാണ മേഖലയിലെ തൊഴിലാളികളുടെ ഉപജീവന മാർഗം

കൂടുതൽ മെച്ചപ്പെടുത്താനും അവരുടെ വരുമാനം വർദ്ധിപ്പിക്കുവാനും കഴിയും .

അസംസ്‌കൃത വസ്തുവായ കളിമണ്ണിന്റെ ക്ഷാമവും വിലക്കയറ്റവും മൂലം പരമ്പരാഗത മൺപാത്ര നിർമാണം വലിയ പ്രതിസന്ധികൾ നേരിടുകയാണ് . നിർമാണ ചെലവിനനുസരിച്ച് ആനുപാതികമായ വില ലഭിക്കാത്തതും മൺപാത്ര നിർമാണത്തെ സാരമായി ബാധിക്കുകയും ചെയ്തു . ഇത്തരം പ്രശ്നങ്ങൾ മറികടക്കാനുള്ള പദ്ധതിയുടെ ഭാഗമായാണ് സംസ്ഥാന സർക്കാർ കുംഭാര കോളനികളുടെ അടിസ്ഥാന സൗകര്യ വികസനം ഫലപ്രദമായി നടപ്പിലാക്കാനും കാര്യക്ഷമമാക്കാനും തീരുമാനിച്ചത് .

പൊന്നാനിയിലെ കുംഭാര കോളനിയുടെ അടിസ്ഥാന സൗകര്യ വികസനം ഉയർത്തുന്നതിന് വേണ്ടി ശ്രീ. പി. നന്ദകുമാർ MLA പിന്നോക്ക വിഭാഗ വികസന വകുപ്പ് മന്ത്രിയായ ശ്രീ. കെ. രാധാകൃഷ്ണന്റെ മുന്നിൽ വിഷയം അവതരിപ്പിക്കുകയും പദ്ധതി രേഖ സമർപ്പിക്കുകയും ചെയ്തിരുന്നു. ഈ ഇടപെടലിന്റെ ഭാഗമായിട്ടു കൂടിയാണ് സർക്കാർ 20 ലക്ഷം രൂപ ഫണ്ടനുവദിച്ച് ഉത്തരവിറക്കിയിരിക്കുന്നത്.