By എൻ്റെ പൊന്നാനി | My Ponnani
പൊന്നാനി: പൊന്നാനിയിലെ ജനകീയ ഫയര്‍മാന്‍ എന്ന വിശേഷണത്തിനുടമയായ അയ്യൂബ് ഖാന്‍ അഗ്‌നി രക്ഷ സേന നിന്ന് വിരമിക്കുന്നു. സര്‍വ്വീസിലെ മികച്ച പ്രകടനങ്ങള്‍ക്കൊപ്പം സുരക്ഷ പ്രശ്‌നങ്ങളുമായി സമീപിക്കുന്നവര്‍ക്ക് പരിഹാരവുമായി ഏത് സമയത്തും ഓടി യെത്തിയിരുന്ന അമ്പലത്ത് വീട്ടില്‍ അയ്യൂബ് ഖാന്‍ നാട്ടുകാരുടെ സ്വന്തം ഫയര്‍ ഫോഴ്‌സ് ആയിരുന്നു. മലപ്പുറം, പാലക്കാട് ജില്ലകളിലെ പ്രധാന അപകട മേഖലകളിലെല്ലാം അയ്യൂബ് ഖാന്റെ സേവനം ലഭ്യമായിരുന്നു. കടലുണ്ടി തീവണ്ടി അപകടം, കവളപ്പാറ ദുരന്തം, രണ്ട് പ്രളയം, പൂക്കിപ്പറമ്പ് ബസ് അപകടം, ആലൂര്‍, മൂതൂര്‍ എന്നിവിടങ്ങളിലെ വെടിക്കെട്ട് ദുരന്തം എന്നീ അപകട മേഖലയിലെല്ലാം രക്ഷാ ദൗത്യവുമായി മുന്‍ നിരയില്‍ ഇദ്ദേഹം പ്രവര്‍ത്തിച്ചു. 26 വര്‍ഷത്തെ സേവന കാലയളവില്‍ 38 റിവാര്‍ഡുകള്‍ ലഭിച്ച അപൂര്‍വ്വം ഫയര്‍മാന്‍മാരില്‍ ഒരാളാണ്. സേവനങ്ങളിലെ മികവ് പരിഗണിച്ച് 2017 ല്‍ മുഖ്യമന്ത്രിയുടെ അവാര്‍ഡും, 2020 ല്‍ രാഷ്ട്രപതിയുടെ അവാര്‍ഡും ഇദ്ദേഹത്തെ തേടിയെത്തി.
കഴിഞ്ഞ ഇരുപത്തി ആറ് വര്‍ഷമായി പൊന്നാനി, ഗുരുവായൂര്‍, മലപ്പുറം യൂണിറ്റുകളില്‍ ഫയര്‍മാനായി സേവനമനുഷ്ഠിച്ച അയ്യൂബ് ഖാന്‍ നിരവധി രക്ഷാപ്രവര്‍ത്തനങ്ങളില്‍ പങ്കാളിയായി. സാഹസികമായ ഒട്ടനവധി രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കിയ ഇദ്ധേഹം കുറ്റിപ്പുറംമിനി പമ്പയിലെ രക്ഷാ പ്രവര്‍ത്തനത്തിന് നേതൃത്വം കൊടുക്കാറുണ്ട്. വെള്ളത്തിലുള്ള അപകടങ്ങള്‍ക്ക് രക്ഷാപ്രവര്‍ത്തനം നടത്താന്‍ സ്‌കൂബ ഡൈവിങ്ങ് പരിശീലനം ലഭിച്ചയാളാണ് അയ്യൂബ് ഖാന്‍. ഫയര്‍ഫോഴ്‌സിന് കീഴില്‍ 15 വര്‍ഷം മുമ്പ് ആരംഭിച്ച സ്‌കൂബ ഡൈവിങ് സേനയിലെ മികച്ച ഡൈവിങ് മാനാണ് അയ്യൂബ് ഖാന്‍.
ഇദ്ദേഹത്തിന്റെ കീഴില്‍ വിവിധ ജില്ലകളില്‍ നിരവധി പേര്‍ സ്‌കൂബ ഡൈവിങ് സ്വായത്തമാക്കുകയും ചെയ്തു.പാലക്കാട് ജില്ലയിലെ കുമ്പിടിയില്‍ കരിങ്കല്ല് കയറ്റിവരുന്ന ലോറി കൂറ്റന്‍ ക്വാറിയിലേക്ക് വീണപ്പോള്‍ അതി സാഹസികമായി ക്വാറിയിലിറങ്ങി ലോറിയില്‍ കുരുക്കിട്ട് രക്ഷാപ്രവര്‍ത്തനം നടത്തിയതും ഇദേഹമായിരുന്നു. സാമൂഹ്യ സേവന രംഗത്തും നിറസാന്നിധ്യമാണ്.മെയ് 31-ന് പൊന്നാനി അഗ്‌നി രക്ഷ സേനയില്‍ നിന്നും ഇദ്ദേഹം വിരമിക്കും.
ആനപ്പടി എല്‍ പി സ്‌കൂളിലെ അധ്യാപിക ഫാരിഷയാണ് ഭാര്യ, മക്കള്‍ : ഫിദ, നിദ, ദിയ