By എൻ്റെ പൊന്നാനി | My Ponnani
എടപ്പാൾ : പെരുമ്പറമ്പ് മഹാദേവ ക്ഷേത്രത്തിലെ ഉത്സവത്തിന് കൊടിയേറി. തന്ത്രി കെ.ടി. നാരായണൻ നമ്പൂതിരിപ്പാട്, പി.എം. മനോജ് എമ്പ്രാന്തിരി, തോട്ടുപുറം ശങ്കരനാരായണൻ നമ്പൂതിരി, ഏർക്കര സജി നമ്പൂതിരി, പി.എം. ശ്രീരാജ് എമ്പ്രാന്തിരി എന്നിവരുടെ കാർമികത്വത്തിൽ വാദ്യഘോഷങ്ങളുടെ അകമ്പടിയോടെയാണ് കൊടിയേറ്റം നടന്നത്.
രാവിലെ പരികലശാഭിഷേകം, പാമി, ബ്രഹ്മകലശാഭിഷേകം, ശ്രീഭൂതബലി എന്നിവയോടെയാണ് പരിപാടികളാരംഭിച്ചത്. വൈകുന്നേരം ആചാര്യവരണത്തിനും മുളയിടലിനും ശേഷമാണ് നിരവധി ഭക്തരുടെ സാന്നിധ്യത്തിൽ കൊടിയേറ്റം നടന്നത്.തുടർന്ന് ശുകപുരം ദിലീപും സംഘവുമവതരിപ്പിച്ച തായമ്പകയുമുണ്ടായി. വ്യാഴാഴ്ച ദിക്കൊടി പ്രതിഷ്ഠ, മുളപൂജ, ശ്രീഭൂതബലി എന്നിവയ്ക്കുശേഷം മേളം നടക്കും.രാത്രി ശുകപുരം രഞ്ജിത്തിന്റെ തായമ്പകയുമുണ്ടാകും.
12-നാണ് ആർദ്രാദർശന ഉത്സവം. കലാമണ്ഡലം ശശിയും സംഘവുമവതരിപ്പിക്കുന്ന പഞ്ചവാദ്യം, എഴുന്നള്ളിപ്പ്, ദേശവരവുകൾ എന്നിവയ്ക്കുശേഷം രാത്രി ഗുരുവായൂർ കൃഷ്ണനും സംഘവുമവതരിപ്പിക്കുന്ന ഭക്തിഗാനമേളയുമരങ്ങേറും. 13-ന് മെഗാ തിരുവാതിരക്കളിയുമുണ്ടാകും.കെ.എം. പരമേശ്വരൻ നമ്പൂതിരി, ദിലീപ്, ടി.പി. കുമാരൻ, കെ.വി. വിജയൻ, യു.വി. ഉദയൻ, ടി.കെ.മോഹനൻ, വി.പി. നാരായണൻ കുട്ടി, കെ.പി. രാജൻ, വിനീഷ്, കെ സുരേഷ് എന്നിവർ നേതൃത്വം നൽകി.