മലപ്പുറം: നഗരസഭാ പരിധിയിലുള്ള നിരവധി ഗ്രാമീണ ബ്രാഞ്ച് പോസ്റ്റ് ഓഫീസുകൾ അടച്ചുപൂട്ടൽ ഭീഷണിയിലാണെന്ന് റിപ്പോർട്ട്. നഗരപരിധിയിലെ ഗ്രാമീണ തപാൽ ഓഫീസുകൾ അടച്ചുപൂട്ടണമെന്ന പോസ്റ്റൽ ഡയറക്ടറേറ്റിന്റെ നിർദേശമാണ് ആശങ്കയ്ക്ക് കാരണം. ഒക്ടോബർ 31നകം നടപടി പൂർത്തിയാക്കണമെന്നാണ് നിർദേശമെന്ന് തപാൽ ജീവനക്കാരുടെ സംഘടനയായ എൻ.എഫ്.പി.ഇ. നേതാക്കൾ പറയുന്നു.
നഗരസഭാ പരിധിയിലുള്ള ബ്രാഞ്ച് പോസ്റ്റ് ഓഫീസുകൾ ഗ്രാമീണ മേഖലകളിലേക്ക് മാറ്റുകയോ ഉയർന്ന നിലവാരത്തിലുള്ള ഓഫീസുകളായി ഉയർത്തുകയോ വേണമെന്നാണ് തപാൽ വകുപ്പിന്റെ നിർദേശമെന്നാണ് റിപ്പോർട്ട്. എന്നാൽ, ഇതിനായുള്ള നടപടികൾ സ്വീകരിച്ചിട്ടില്ലെന്നും ഓഫീസുകൾ പെട്ടെന്ന് മാറ്റിസ്ഥാപിക്കുന്നത് പ്രായോഗികമല്ലെന്നും എൻ.എഫ്.പി.ഇ. ആരോപിക്കുന്നു.
തിരൂർ ഡിവിഷനു കീഴിൽ കോട്ടക്കൽ, കുറ്റിപ്പുറം, കടവനാട്, ബിയ്യം, ഈശ്വരമംഗലം എന്നിവിടങ്ങളിലെ ബ്രാഞ്ച് പോസ്റ്റ് ഓഫീസുകളാണ് അടച്ചുപൂട്ടൽ ഭീഷണി നേരിടുന്നത്. മഞ്ചേരി ഡിവിഷനു കീഴിലുള്ള നിരവധി ഓഫീസുകളും പട്ടികയിലുണ്ട്.
പോസ്റ്റ് ഓഫീസുകൾ അടച്ചുപൂട്ടുന്നത് പ്രദേശവാസികൾക്ക് തപാൽ സേവനങ്ങൾ ലഭ്യമാകുന്നതിനെ പ്രതികൂലമായി ബാധിക്കുമെന്ന ആശങ്കയും ഉയരുന്നു. പൊതുജനങ്ങൾക്ക് പ്രയോജനകരമായ തപാൽ സേവനകേന്ദ്രങ്ങൾ നിലനിർത്തണമെന്നും അടച്ചുപൂട്ടൽ നീക്കത്തിൽനിന്ന് വകുപ്പ് പിന്മാറണമെന്നും എൻ.എഫ്.പി.ഇ. ആവശ്യപ്പെട്ടു. തപാൽ സേവനങ്ങൾ സംരക്ഷിക്കാൻ ജനങ്ങളും ബഹുജന പ്രസ്ഥാനങ്ങളും രംഗത്തിറങ്ങണമെന്നും സംഘടന അഭ്യർഥിച്ചു.