സ്വകാര്യ ബസുകൾക്കെതിരേ അക്രമം: പ്രശ്നത്തിന് പരിഹാരം

എടപ്പാൾ : സ്വകാര്യ ബസുകൾക്കെതിരേ വിദ്യാർഥികളുടെയും ഒരു വിഭാഗം രക്ഷിതാക്കളുടെയും അക്രമം വർധിച്ചുവരുന്നതിൽ പ്രതിഷേധിച്ച് ബുധനാഴ്ച നടത്താനിരുന്ന അനിശ്ചിതകാല ബസ് സമരത്തിൽനിന്ന് ബസുടമകൾ പിൻമാറി. ബസിന്റെ ചില്ല് എറിഞ്ഞുടച്ച വിദ്യാർഥിയെ കണ്ടെത്തിയശേഷം പോലീസിന്റെ സാന്നിധ്യത്തിൽ നടന്ന ചർച്ചയിലാണ് പണിമുടക്ക് പിൻവലിക്കാൻ ധാരണയായത്.

പൊന്നാനി താലൂക്ക് പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷൻ, കേരള ബസ് ട്രാൻസ്‌പോർട്ട് അസോസിയേഷൻ എന്നീ സംഘടനകളാണ് പൊന്നാനി താലൂക്കിൽ അനിശ്ചിതകാല പണിമുടക്ക് പ്രഖ്യാപിച്ചിരുന്നത്. ഇക്കഴിഞ്ഞ വെള്ളിയാഴ്ച പൊന്നാനിയിൽനിന്ന് എടപ്പാളിലേക്ക് വരികയായിരുന്ന സിന്ദൂരം ബസിന്റെ പുറകിലെ ചില്ല് ഒരു വിദ്യാർഥി കല്ലെറിഞ്ഞ് തകർത്തിരുന്നു. മറ്റൊരു ബസിനെ കാറിലെത്തിയ ഒരു സംഘം തടഞ്ഞുനിർത്തി കാറിലുണ്ടായിരുന്ന വിദ്യാർഥികളെ ബലമായി ബസിൽ കയറ്റിച്ച സംഭവവുമുണ്ടായി.