By Myponnani
പൊന്നാനി : പ്രകൃതിസുന്ദരമായ പൊന്നാനിയിലെ പുളിക്കക്കടവ് ബിയ്യം കായൽ ഒന്നാംനിര കായൽ ടൂറിസം കേന്ദ്രമാക്കി മാറ്റാൻ നഗരസഭ. റോപ്പ്‌വേയും കയാക്കിങും വാട്ടർസ്‌കൂട്ടറും ഉൾപ്പെടെ വിവിധ റൈഡുകൾ ഉൾക്കൊള്ളുന്ന കായൽത്തീരമായി പൊന്നാനി പുളിക്കക്കടവ് മാറും.പൊന്നാനി നഗരസഭയുടെ നേതൃത്വത്തിൽ ടെൻഡർ നടപടികൾ പൂർത്തിയായിവരുന്നു. ഇതുമായി ബന്ധപ്പെട്ട് താത്പര്യപത്രം ക്ഷണിച്ചിട്ടുണ്ട്. ഇതിന് കൗൺസിൽ അംഗീകാരം നൽകിക്കഴിഞ്ഞു. കരാർ വെക്കാനുള്ള നോട്ടീസ് ഏറ്റെടുത്ത വ്യക്തിക്ക് നൽകുകയുംചെയ്തു.
ആദ്യ മൂന്നുവർഷത്തേക്ക്‌ 2.7 ലക്ഷം രൂപ കരാറെടുത്തവർ നഗരസഭയ്ക്കു നൽകണം. ടിക്കറ്റ് ഇനത്തിൽ കിട്ടുന്ന വരുമാനത്തിന്റെ 10 ശതമാനം വിനോദനികുതിയും നഗരസഭയ്ക്കു നൽകണം. കയാക്കിങ്, വാട്ടർബോൾ, ബോട്ട് സർവീസ്, വാട്ടർ സ്‌കൂട്ടർ, കാഞ്ഞിരമുക്കിൽനിന്ന്‌ പൊന്നാനി തീരത്തേക്ക് നീളുന്ന റോപ്പ്‌വേ തുടങ്ങി വിവിധ പദ്ധതികളാണ് ആവിഷ്‌കരിക്കുന്നത്.നേരത്തേ ഇവിടെ ബോട്ട് സർവീസ് ഉണ്ടായിരുന്നെങ്കിലും പിന്നീട് നിലയ്ക്കുകയായിരുന്നു. കായൽത്തീരവും ടൂറിസം പ്രദേശവുമെല്ലാം മുൻപ് ഡി.ടി.പി.സി.യുടെ ഉടമസ്ഥതയിലായിരുന്നു. നഗരസഭയുടെ അധീനതയിൽ വന്നതോടെയാണ് ഉണർവുണ്ടായത്.പ്രവർത്തനരഹിതമായ തൂക്കുപാലവും നഗരസഭ ഇപ്പോൾ നവീകരിച്ചിട്ടുണ്ട്. പുളിക്കക്കടവ് ബിയ്യം കായലിനെയും താമസിയാതെ തിരക്കേറിയ ടൂറിസം കേന്ദ്രമാക്കി മാറ്റുകയാണ് നഗരസഭയുടെ ലക്ഷ്യം.
എൻ്റെ പൊന്നാനി | My Ponnani