ഇരുകരതൊട്ട് പുറത്തൂർ നായർതോട് പാലം

പാലം യാഥാർഥ്യമാവുന്നതോടെ പടിഞ്ഞാറെക്കരയിൽനിന്നും ചമ്രവട്ടം പാലത്തിലേക്കുള്ള ദൂരം 20 കിലോമീറ്ററോളം കുറയും. പടിഞ്ഞാറേക്കരക്കാർക്ക് പഞ്ചായത്ത് ഓഫീസിലേക്കും ജില്ലയിലെ പ്രധാന വിദ്യാഭ്യാസ സ്ഥാപനങ്ങളിലേക്കുള്ള യാത്രയും എളുപ്പമാവും. നിലവിൽ മൂന്ന് ബസുകൾ മാറിക്കയറി വേണം യാത്രചെയ്യാൻ. പാലം വരുന്നതോടെ പ്രധാന വിനോദസഞ്ചാര കേന്ദ്രങ്ങളിലേക്കും ബീച്ചുകളിലേക്കും പൊന്നാനി ഹാർബറിലേക്കും എളുപ്പത്തിലെത്താനാകും.ഫാറൂക്ക് ഭാഗത്തുനിന്നും തീരദേശപാത വഴി വരുന്നവർക്ക് നഗരതിരക്കുകളൊഴിവാക്കി എളുപ്പത്തിൽ പൊന്നാനിയിലെ ദേശീയപാതയിലെത്താനാകും.പാലത്തിന് 20 മീറ്ററിന്റെ എട്ട് സ്പാനുകളും 36.20 മീറ്ററിന്റെ ആറ് സ്പാനുകളും നടുവിലായി 55 മീറ്ററിന്റെ ഒരു ബോസ്ട്രിങ് ആർച്ച്സ്പാനുമാണുള്ളത്. ദേശീയ ജലപാതയ്ക്ക് കുറുകെയായതിനാൽ ഇൻലാൻഡ് വാട്ടർ വെയ്‌സ് അതോറിറ്റി ഓഫ് ഇന്ത്യ (ഐ.ഡബ്ല്യു.എ) മാനദണ്ഡങ്ങൾ അനുസരിച്ച് നടുവിലുള്ള സ്പാനിന് 55 മീറ്റർ നീളവും ആറ് മീറ്റർ ഉയരവും നൽകിയാണ് നിർമിക്കുന്നത്.കൂടാതെ പാലത്തിന്റെ ഇരുവശത്തുമായി ആകെ 470 മീറ്റർ അപ്രോച്ച് റോഡുമുണ്ട്.

ആകെ 11 മീറ്റർ വീതിയാണ് പാലത്തിനുള്ളത്. ഇതിൽ 7.50 മീറ്റർ വീതിയിൽ ടാറിങ്ങും ഇരുവശത്തും 1.50 മീറ്റർ വീതിയിൽ കൈവരിയോടു കൂടിയ നടപ്പാതയും ഉൾപ്പെടും. കിഫ്‌ബി മാനദണ്ഡമനുസരിച്ച് പാലത്തിന്റെ അതേ വീതിയിലാണ് അപ്രോച്ച് റോഡും നിർമിക്കുന്നത്. പാലത്തിലും അപ്രോച്ച് റോഡിനും ആവശ്യമായ വൈദ്യുതീകരണ പ്രവൃത്തികളും പദ്ധതിയിൽ ഉൾപ്പെടുത്തിയിട്ടുണ്ട്.അപ്രോച്ച് റോഡ് നിർമാണത്തിനുള്ള സ്ഥലം ഏറ്റെടുപ്പ് തർക്കങ്ങൾ പരിഹരിച്ച് വേഗത്തിൽ ഏറ്റെടുക്കാനുള്ള ശ്രമത്തിലാണ് അധികൃതർ.നായർതോട് പാലം യാഥാർഥ്യമാകുന്നതോടെ തീരദേശത്തെ ടൂറിസംരംഗത്ത് കുതിപ്പേകും. തിരൂർ -പൊന്നാനിപ്പുഴ ഭാരതപ്പുഴയോടു ചേർന്ന് അറബിക്കടലിനോടു സംഗമിക്കുന്ന പടിഞ്ഞാറെക്കര അഴിമുഖത്തെ കാഴ്ച കാണാൻ പുതിയ പാലം എളുപ്പ വഴിയൊരുക്കും. ഗോമുഖം കടവിൽ വർഷംതോറും നടക്കുന്ന വള്ളത്തോൾ സ്മാരക വള്ളംകളിയിൽ കൂടുതൽ കാഴ്ചക്കാർക്കെത്താനും ഇതുപകരിക്കും. പുറത്തൂർ പള്ളിക്കടവിലെ അഴിമുനമ്പ്, മുരിക്കുംമാട് ദ്വീപ് തുടങ്ങിയിടങ്ങളിലേക്കും വേഗത്തിൽ എത്തിച്ചേരാനാകും. ബോട്ട്, ഹൗസ്ബോട്ട് സർവീസുകളുടെ സാധ്യതയും വർധിക്കും.