പൊന്നാനി: ചന്തപ്പടി–തൃക്കാവ് റോഡിൽ പൊതുമരാമത്ത് വകുപ്പ് ഒന്നരക്കോടി രൂപ ചെലവിൽ നിർമിച്ച ടേക്ക് എ ബ്രേക്ക് വിശ്രമകേന്ദ്രം ഉദ്ഘാടനം കഴിഞ്ഞ് ഒമ്പത് മാസമായിട്ടും പൊതുജനങ്ങൾക്ക് തുറന്നുകൊടുത്തിട്ടില്ല. കേന്ദ്രത്തിന്റെ നടത്തിപ്പും കൈമാറ്റവും സംബന്ധിച്ച അനിശ്ചിതത്വമാണ് വൈകലിന് കാരണമെന്നാണ് ഉയരുന്ന വിമർശനം.
വിശ്രമകേന്ദ്രവും കഫേയും ഉൾപ്പെടെ നിർമിച്ച പദ്ധതിയുടെ നടത്തിപ്പ് പൊന്നാനി നഗരസഭയ്ക്ക് കൈമാറാനായിരുന്നു ആദ്യഘട്ടത്തിലെ തീരുമാനം. നഗരസഭയുടെ നേതൃത്വത്തിൽ കുടുംബശ്രീക്ക് നടത്തിപ്പ് നൽകി വനിതാ സംരംഭമായി കേന്ദ്രം പ്രവർത്തിപ്പിക്കാനായിരുന്നു ധാരണ.
എന്നാൽ കേന്ദ്രത്തിന്റെ നടത്തിപ്പ് നഗരസഭയ്ക്ക് കൈമാറിയിട്ടില്ല. പൊതുമരാമത്ത് വകുപ്പിന്റെ കീഴിലുള്ള ആശ്വാസ് പദ്ധതിയിലൂടെ നേരിട്ട് ടെൻഡർ ക്ഷണിച്ച് നടത്തിപ്പ് ഏൽപ്പിക്കാനാണ് ഇപ്പോഴത്തെ നീക്കമെന്നാണ് റിപ്പോർട്ട്. എം.എൽ.എയുടെ ഇടപെടലിനെ തുടർന്നാണ് കൈമാറ്റം തടസ്സപ്പെട്ടതെന്നും മറ്റൊരു വിഭാഗത്തിന് നടത്തിപ്പ് നൽകാനാണ് ശ്രമമെന്നും വാർത്തയിൽ ആരോപണമുണ്ട്. എന്നാൽ ഇതുസംബന്ധിച്ച് എം.എൽ.എയുടെ വിശദീകരണം ലഭ്യമായിട്ടില്ല.
കേന്ദ്രം ഇതുവരെ തുറന്നുകൊടുക്കാത്തതിൽ പ്രദേശവാസികൾക്കിടയിൽ പ്രതിഷേധവും ഉയരുന്നുണ്ട്.
മുൻ എം.എൽ.എ പി. നന്ദകുമാറിന്റെ ഇടപെടലിൽ ഒന്നരക്കോടി രൂപ ചെലവഴിച്ചാണ് ചന്തപ്പടി പ്രദേശത്ത് സൗന്ദര്യവൽക്കരണവും നടപ്പാത നിർമാണവും ഉൾപ്പെടെയുള്ള പ്രവൃത്തികൾ നടത്തിയത്. ഇതിന് സമീപമുള്ള പൊതുമരാമത്ത് വകുപ്പിന്റെ സ്ഥലത്താണ് ടേക്ക് എ ബ്രേക്ക് നിർമിച്ചത്. മുൻ എം.എൽ.എയുടെ ആസ്തിവികസന ഫണ്ടിൽനിന്ന് അനുവദിച്ച 26 ലക്ഷം രൂപ ഉപയോഗിച്ചുള്ള ചിൽഡ്രൻസ് പാർക്കിന്റെ നിർമാണവും സമീപത്ത് പുരോഗമിക്കുകയാണ്.
പദ്ധതി പൊതുജനങ്ങൾക്ക് പ്രയോജനപ്പെടുന്ന രീതിയിൽ എപ്പോൾ തുറന്നുകൊടുക്കുമെന്നതാണ് ഇനി അറിയേണ്ടത്.